Fyrilesturin “Viderø og vitalisman” er um Kristian Osvald Viderø, ferðir og ritverk hansara og um hugsjónarlig rák, sum ávirkaðu hansara skriving. Serliga verður tikið fram, hvussu sonevnda vitalistiska rákið í fyrru helvt av 20. øld sæst aftur í teimum ferðafrásagnunum, sum hann skrivaði og læt prenta. Vitalisman tók seg upp í Týsklandi seint í 19. øld og ávirkaði bókmentir og list í Evropa umleið 1890 til 1945. Ein grundhugsan í vitalismuni er, at í øllum livandi býr ein megi, sum ikki kann bindast í reglur ella formlar, men áhaldandi er í rørslu. Vitalisman sprettur úr hugsanum um jarðiska megi, men Viderø royndi at knýta vitalismuna í sína kristnu trúgv. Eitt úrslit av hesum er m.a. serliga myndamál hansara. Borgarstjórin Torbjørn Jacobsen innleiðir. Tiltakið varir í ein tíma og eftir fyrilesturin bjóðar kirkjan kaffi.